चितवन – दाङमा रड प्रहार गरि एक व्यक्तिले श्रीमतीको हत्या गरेका छन् । तुलसीपुर उपमहागनरपालिका वडा नम्बर ४ तल्लो हलवारका ४३ वर्षीय पेण्डुवा चौधरीले श्रीमती ४२ वर्षीया लक्ष्मी चौधरीलाई टाउकोमा रड प्रहार गरी हत्या गरेको प्रहरीले बताएको छ ।
इलाका प्रहरी कार्यालय तुलसीपुरका प्रहरी निरीक्षक नवरत्न मल्लका अनुसार मदिराले मातेका चौधरीले श्रीमतीलाई रडले हान्दा घटनास्थलमै मृत्यु भएको हो । चौधरी धेरै मदिरा खाने भएकाले घटना भएको हुन सक्ने प्रहरीको प्रारम्भिक अनुमान छ । शनिबार साँझ ६ बजेतिर घटना भएको हो । श्रीमतीको हत्यापछि अबस्था बुझ्न त्यहाँ पुगेका स्थानीयहरुलाई पनि उनले रड प्रहार गरेका छन् ।
स्थानीय मिना थापा र शिला चौधरीलाई रड प्रहार गर्दा उनीहरु घाइते भएका छन् । मिनाको टाउकोमा चोट लागेको छ, भने शिलाको हड्डीमा चोट लागेको छ । दुबै जनाको राप्ती प्रादेशिक अस्पताल तुलसीपुरमा उपचार भइरहेको छ । शिलालाई दिउँसो हाडरोग विशेषज्ञलाई देखाउने तयारी रहेको छ । उनीहरुको अवस्था भने सामान्य रहेको तुलसीपुर ४ का वडाध्यक्ष तुलसी थापाले जानकारी दिए ।
