चितवन – नवलपुरको मध्यविन्दु नगरपालिका–१२ बेलहानीमा श्रीमान्–श्रीमती मृतावस्थामा फेला परेका छन् ।
जिल्ला प्रहरी कार्यालय नवलपुरका प्रहरी निरीक्षक कमल परियारका अनुसार अन्दाजी ६०/६५ वर्षीय श्रीमान् तुलबहादुर कुमाल र अन्दाजी ५०/५५ वर्षीया मीना कुमाल मृतावस्थामा आफ्नै घरमा भेटिएका हुन् ।
स्थानीय बासिन्दाका अनुसार कुमालको बन्दै गरेको नयाँ घर बनाउन आउने कामदारहरुले घरका मान्छे आज किन अबेरसम्म उठेन भनेर खोजीनिती गर्दा दुवै जना मृतावस्थामा फेला परेका हुन् । तुलबहादुर राति साढे ८ बजेसम्म छिमेकीहरुसँग गफ गरिरहेको स्थानीयले बताएका छन् ।
श्रीमती मीना कुमालको टाउकामा चोट लागेको छ भने श्रीमान् तुलबहादुर कुमाल झुन्डिएको अवस्थामा भेटिएका छन् । प्रहरीले हत्याको आशंका गरेको छ । स्थानीयले श्रीमान्ले श्रीमतीको हत्या गरी आफू पनि झुन्डिएर आत्महत्या गरेको आशंका गरेका छन् । यसअघि पनि श्रीमान् श्रीमतीबीच बेलाबेलामा झगडा हुने गरेको स्थानीयले बताएका छन् ।
शव पोष्ट मार्टमका लागि मध्यविन्दु जिल्ला अस्पताल ल्याइएको छ । जिल्ला प्रहरी कार्यालय नवलपुरका प्रहरी उपरीक्षक नरहरि रेग्मीले स्थानीय र आफन्तको भनाइ अनुसार श्रीमान्ले श्रीमतीको हत्या गरी आत्महत्या गरेको बुझिए पनि पोष्ट मार्टम रिपोर्ट नआएसम्म केही भन्न नसकिने बताए ।
