काठमाण्डौ – आउँदो शनिवारदेखि हुन लागेको पहिलो संस्करणको नेपाल प्रिमियर लिग (एनपीएल)का लागि टिकट मूल्य निर्धारण भएको छ ।
नेपाल क्रिकेट सङ्घ (क्यान) ले हिजो विज्ञप्ति जारी गर्दै टिकट मूल्य सार्वजनिक गरेको हो । उद्घाटन खेलका लागि सामान्यतर्फ तीन सय र भीआईपीतर्फ सात सय रुपैयाँ टिकट मूल्य राखिएको क्यानले जनाएको छ ।
त्यस्तै लिग चरणका अन्य खेलका लागि सामान्यतर्फ तीन सय र भीआईपीतर्फ पाँच सय रुपैयाँ मूल्य तय गरिएको छ । एनपीएलको प्लेअफका खेल हेर्ने दर्शकहरूले सामान्यतर्फ पाँच सय र भीआईपीतर्फ सात सय रुपैयाँको टिकट काट्नुपर्नेछ ।
त्यस्तै, फाइनल खेलका लागि भने सामान्यतर्फ पाँच सय र भीआईपीतर्फ एक हजार रुपैयाँ मूल्य तोकिएको क्यानले जनाएको छ । टिकट खल्ती वालेटबाट काट्न सकिने क्यानले जनाएको छ । सिजनल पासको हकमा २० प्रतिशत छुटसहित सामान्यतर्फ चार हजार चार सय ८० र भीआईपीतर्फ आठ हजार दुई सय ४० रुपैयाँ मूल्य निर्धारण गरिएको क्यानको विज्ञप्तीमा उल्लेख छ ।
